*** Figurar i LaTeX og relatert teknisk informasjon ***
***     (Iver Bakken Sperstad, 25.10.2011)          ***


Apparaturskisse og MATLAB-plots vil vi gjerne inkludere elektronisk i rapporten vår, og dette dokumentet 
inneheld litt info i samband med det.

Aller fyrst -- hovudpoenget: Vi anbefaler å typesetje rapporten direkte til PDF-format, noko de i Texmaker 
eller TexnicCenter gjer ved å velje "LaTeX -> PDF" e.l. i nedtrekkslista øverst i vindauget. Dette føreset 
at alle figurar må vere i PDF-, JPEG- eller PNG-format. Detaljar og alternativ fylgjer nedanfor.


* Ulike filformat *

Litt grunnleggjande om bileteformat: ein skil mellom bitmaps og vektorgrafikk, og skal vi inkludere figurar 
i LaTeX vil vi helst bruke sistnemnte. Årsaka er at vektorgrafikk kan skalerast, og dermed ikkje blir 
kornete og fæl slik ein bitmap-figur blir når biletet blåsast opp. Av aktuelle format kan EPS- og PDF-filer 
innehalde vektorgrafikk, men treng ikkje gjere det; derimot vil f.eks. BMP, JPEG og PNG alltid vere bitmaps.

Kva filformat de har på figurane har betydning for kva format de kan typesetje til. Ein har i hovudsak tre 
former for typesetjing av LaTeX-dokument: a) DVI, b) PDF og c) PS.
a) Typeset de til til DVI så blir eigentleg ikkje biletefilene inkludert i .dvi-fila, men må vedleggjast 
(i same mappe) for å kunne visast. Andre bilete-format enn EPS støttast som regel ikkje.       
b) Om de typeset til PDF så bør bileta i utgangspunktet vere i PDF-format, men JPEG- og PNG-format skal 
også støttast. EPS støttast i utgangspunktet ikkje.
c) PS (PostScript) fungerer stort sett likt som DVI, men her kan figurane inkluderast i .ps-fila.


* Figurar frå MATLAB *

Om de vil inkludere figurane frå MATLAB i LaTeX kan de gjere eitt av fylgjande (alternativ 2 anbefalast): 
1) De kan lagre fila i EPS-format og så anten typesetje til DVI, eller de kan konvertere EPS-fila til PDF 
(sjå nedanfor) og typesetje til PDF.
2) Prosedyre for å lagre direkte til PDF-format er litt meir omstendeleg om ein skal gjere det skikkeleg: 
Trykk fyrst File -> Print Preview. Vel Auto under Placement og juster storleiken under Paper slik at 
figuren fyller heile arket. Trykk deretter File -> Export setup i det opprinnelege figurvindauget. Still 
opp Resolution til minst 300 dpi under alternativ for Rendering. Vel deretter å lagre i PDF-format etter 
å ha trykt på Export.

Merk at vi helst ikkje har lyst til å inkludere nokon 'title' i MATLAB-figuren når vi skal ha han inn i 
rapporten, for denne figurteksta/tittelen plasserer MATLAB som regel over figuren i staden for under, og 
figurteksta kjem vi jo til å leggje til i LaTeX i alle tilfelle.


* Konverte til PDF *

Sidan det er PDF som er standarden for elektroniske dokument bør de helst konvertere rapporten til 
PDF-format etterpå dersom de vel å typesetje som PS eller DVI. (Dvs.: dersom de har tenkt å sende dokumentet 
elektronisk; skal de berre skrive det ut har det ikkje så stor betydning.) Korleis ein gjer dette avheng 
av programvara de bruker:
- Dersom de typeset til PS kan de konvertere med Ghostscript/GSView. (Ghostscript fylgjer vanlegvis med 
MiKTeX, men om ikkje kan de sjå på http://pages.cs.wisc.edu/~ghost/gsview/get49.htm.) Konverter så til PDF 
ved å trykke meny File -> Convert... -> vel pdfwrite -> OK. 
- Dersom de typeset til DVI så har ikkje YAP-visaren som fylgjer med MiKTeX moglegheit til å konvertere til 
PDF direkte. Løysinga blir da å finne eit konverteringsprogram som f.eks. installerast som ein skrivar 
(sjå http://www.ntnu.no/itinfo/programvare/tekstbehandling/lage_pdf_uten_acrobat.html) og kan brukast til 
å "skrive ut" som PDF-file frå YAP.

Om de ynskjer å konvertere frå eit bileteformat til eit anna kan de f.eks. laste ned ImageMagick 
(http://www.imagemagick.org/script/index.php). De kan også enkelt bruke ImageMagick for Linux ved å logge 
inn på login.stud.ntnu.no med din foretrukne ssh-klient og bruke kommando 'convert <biletefil> <biletefil 
med nytt filetternamn>'.


* LaTeX i Inkscape -- alternativ 1 *

Lag figur som vanleg, og skriv LaTeX-kode i dei teksboksane som du vil skal innehalde matematiske symbol. 
(Hugs dollarteikn der nødvendig.) I Inkscape vil du berre sjå LaTeX-koda, men du kan få koda til å bli 
tolka og vist som matematiske symbol i labrapporten om du gjer som fylgjer: 
1) Vel Fil -> Lagre som... / Lagre som kopi...
2) Vel PDF som filformat og trykk Lagre.
3) I dialogboksen som dukkar opp nå kryssar du av for valet PDF+LaTeX; i tillegg til .pdf-fila vil det nå 
dukke opp ei fil med filetternamn .pdf_tex i mappa du lagra i.
4) Opne denne .pdf_tex-fila og les framgangsmåten som står der for å inkludere figuren med matematiske symbol 
i labrapporten din. (Sjølve .pdf-fila inneheld ingen matematiske symbol, men all LaTeX-kode og kva posisjon 
denne skal ha er definert i .pdf_tex-fila. Ved å fylgje framgangsmåten her, får du LaTeX til å typesetje 
.pdf_tex-fila med det same han typeset .tex-fila for rapporten forøvrig. Typesetjing av .pdf_tex-fila 
inkluderer .pdf-fila for figuren i rapporten og plasserer i tillegg dei rette symbola oppå i rett posisjon.)


* LaTeX i Inkscape -- alternativ 2 *

Det finst nokre enda enklare alternativ for å inkludere LaTeX-kode i Inkscape-figuren der ein får ut resultatet 
direkte som éi .pdf-fil, men det krev at enkelte tilleggsprogram er på plass. Problemet her er at 
tilleggsprogramma ikkje utan vidare snakkar saman, som forklart for dei to underalternativa nedanfor:

A) Ein kan setje inn LaTeX-kode direkte i Inkscape gjennom menyvalet Utvidelser -> Tegn -> LaTeX-formel... 
For at dette valet skal visast, må ein sørgje for at programmet pstoedit (http://www.pstoedit.net/pstoedit) 
er installert. I tillegg må ein leggje mappa ein installerer pstoedit i til sti-variabelen for Windows; 
sjå f.eks. http://www.computerhope.com/issues/ch000549.htm.

B) Eit liknande men litt meir fleksibelt alternativ kan ein finne gjennom menyvalet Utvidelser -> Tex Text, 
dersom Inkscape-tillegget textext er installert. Ein kan laste ned dette frå http://pav.iki.fi/software/textext/, 
men også her må ein installere pstoedit (http://www.pstoedit.net/pstoedit) for at tillegget skal fungere. 
Ein har også det problemet at textext (v.0.4.4) ikkje fungerer saman med nyaste versjon av Inkscape (v.0.48). 
Ei løysing kan vere å forsøke framgangsmåten på https://laconsigna.wordpress.com/2010/11/13/fixing-textext-on-inkscape-0-48/, 
mens ein kanskje enklare framgangsmåte kan vere å installere Inkscape v.0.46 i staden for v.0.48.